gobi

a oficina está deserta. todos fuxiron (pregúntome a onde, a facer qué) e podo estirar as pernas sen suscitar miradas incómodas. mesmo o café da máquina sabe mellor. abro a correspondencia sen facerlle moito caso, nada de interese. no mail hai unha mensaxe de f., maldito cabrón, agora tes morriña; e de l., seino, temos que quedar e falar de homes e de kiko neves. no fondo, contra a outra ventá, i. teclea algún tipo de documento enfundada no seu xersei lila omnipresente. as miñas tetas son mellores, pero ten un fermoso cabelo negro sobre as costas. chaman por teléfono. ring, ring, ring. tres veces. toma, toma, toma. dende aquí non se ven os barcos.